Song of Solomon 5
1Nasa'nimogamo a'nimogae, huno, Nagaemo hoya'nilegamo ago e'na alagepa atumo ne'aiya ya'mo agi'amo meya'e mago alagepa atumo ne'aiya ya'e'mo ali'na anupa hu'nove. Nagaemo kevegevemo ali'na ano'a'e anu'a'e'mo ne'nove. Nagaemo nu'anu'e nofi alagafati ani'e'mo ali'na ne'nove. Nao vaya'nimogitapae, huno, alitapa neyo. Nahau nayamopafi'mo ne'nahaiya vaya'nimogitapae, huno, He, ani'mo alita netapa lapamu hiyo.2Hani'ilagamo nau kale'nova'monanafa nagupi mafa'nemo'a au'mo okaleno afa'a mai'niye. Nahau nayamopafi'mo ne'nahaiya veka'nimo agemo afi'nove. Kita'nile'mo hakalu hakalu huteno, Nasa'nimogamo nahau nayamopafi a'nimogae, huno, Kitamo yakika nato. Hani'ilagamo ani'mo'a emineno nagenopafi'mo ani'mo faleno nate'nigeno nayokapi'mo lao ya'mo emineno havai te'niye, huno naha pai'niye. 3Nagaemo kukena'nimo ago asagi'na atale'novanage'na halate haiya kava hu'na ali'na vaiguve. Nagaemo naiya'nimo ago sese hu male'novanage'na halate he ti'na u'ne'na hisugeno naiya'nile'mo o'ani'ya faigiye, hu'na ha pai'nove. 4Nahau nayamopafi'mo ne'nahaiya veka'nimo'a kitamo alita ne'yakuna yate'mo aya'mo ali'nige'na agete'nae'mo naipamo'mo he ti'niye. 5Nagaemo kitamo yaki'na atesuvafe'mo he ti'na kitamo alita ne'yakuna ya'ale'mo naya'mo ne'alugeno'ae'mo meya ani'mo alagepa atu ne'aiya ani'mo nayate hane'niya ani'mo'a kita alita ne'yakuna ya'ale'mo aeno kamae'niye. 6Nagaemo nahau nayamopafi'mo ne'nahaiya veka'nimo kita yaki'na ate'nova'monanafa ago utege'na nagaemo o'age'nove. Nagaemo hu'niya ge'ae'mo nagesamo ne'afugeno'ae'mo naipamo'mo alagi hosu'niye. Nagaemo agaefe'mo kahauya hu'nova'monanafa o'age'nove. Nagaemo keya ae'na ge hu'nova'monanafa agaemo ge'nile'mo aeno atagaina huno ge osu'niye. 7Umenitata nehu'a taonifi'mo ne'yagaiya vaya'mogi nagete'apae'mo namagi'a nagufamo ai'a atalagau'nae. Yafa lafi kegi'yale'mo ne'yagaiya vaya'mogi naugosafi'mo ai'na ati kae'na ne'aluva lavolavo'nimo ali'nae. 8Yulusalemu a'mafa'ne anaga'mogitapae, huno, Lapakaemo nahau nayamopafi'mo ne'nahaiya veka'nimo agetapae'mo agaefe'mo nahau nayamopafi'mo nahau'niya'mofe'mo lokiya'nimo ohane'niye, hutapa ha paiyo, huno hapa pai'niye.
9Alagepa kanale a kanomo mai'neka muki a'ne anaga'mo ago aeka apakase'nana a kanomogae, hu'a, kahau kayamopafi'mo kahau'niya vekamo haiya kava huno mai'neno muki hapau apayamopafi'mo nehapaiya vaya'mo aeno apakase'niye. Haiya kava huno mai'neno muki hapau apayamopafi'mo nehapaiya vaya'mo aeno apakaseno mai'niya'mofe'mo lokiya gefati'mo hiyo, huka laha paine, hu'a ha pai'nae.
10Nahau nayamopafi'mo ne'nahaiya veka'nimo yaveyave augosamo hanege haesa augosamo hanege huno hane'niye. Agaemo asole tauseni'a vaya'mo ago aeno apakase'niye. 11Agenopamo'mo hogote goli yafakana huno le'nigeno ayokaku'mo kanale alopa ayokaku'mo mago anupa namamo ayokagana huno hane'niye. 12Aulagamo'mo kaugo'yave nama anaga'mogi nu'mo anuleti'mo ani'mo fale'a u'a ani agi'nale'mo he ti'a mai'naya namagana huno hane'niye. 13Agalametalegati'mo alagepa atumo ne'aiya yosamo aise yosamo hi'yalamute'mo hane'niya yosagana huno hanege kahaumo ausemo aulafilega hane'niya kahaumo ausegana huno hanege huno hane'niye. Avayamo kanale kahaumo ausegana huno hane'nigeno avayafati'mo alagepa atumo ne'aiya ani'mo meya ani'mo lape tape huno asagauno ne'aiye. 14Ayatala'mo'a goli linimo apayate'mo ne'vaiya linigana huno hane'niye. Alopa monileti'mo miya nefaiya yafa'mo aeno ha neleya yafa'mo apayate'mo ne'vaiya linifi'mo ne'malaya linigana huno hane'niye. Agufamo'a elefeni afumo avekana huno hane'nigeno agufalegati'mo yaveyave'age huteno aeno ha le'niye. 15Aiya'ala'mo kanale yaveyave yafateti'mo alo nehaya posila'mo golilate'mo ae'a he ti'a ate'nageno hane'niya posigana huno hane'niye. Agaemo Lemanoni avegana huno maige alagepa sita yosagana huno maige huno mai'niye. 16Avayafati'mo haga hu'niye. He, muki agufa'amo alagepa agufamo hane'niye. Yulusalemu a'mafa'ne anaga'mogitapae, hu'na, Agaemo nahau nayamopafi'mo ne'nahaiya veka'nimo maige nao veka'nimo maige huno mai'niye, hu'na lapa pai'nove, huno hapa pai'niye.
Copyright information for
KYG